Sesongens fyrste heimekamp er ferdigspelt, og sesongens fyrste siger er sikra. Daniel Arrocha x2 og Edmund Baidoo sikra ein herleg 3-1-siger mot Mjøndalen i dag! Her er høgdepunkta:

Det fyrste målet kom fyrst etter 28 minutt, og det var Mjøndalen som tok leiinga. Ein corner frå høgre vart stanga i mål frå Rasmus Holten, og bortelaget var i føringa. Det ville ikkje vår danske midtstoppar ha noko av.

I det 36. minutt fekk me straffespark når ballen traff armen til Mjøndalen sin Peder Vogt. Daniel Arrocha satte ballen hardt og kontant ned til venstre og i mål. Det var aldri nokon tvil om at den ballen skulle i mål, og dansken kunne juble framfor Saftkokaradn!

Målet ga ein skikkeleg boost og karadn gjekk rett i angrep igjen. Berre 2 minutt etter ballen låg i mål vart Andreas Hoven stanga ned inne i feltet. Nytt straffespark og skikkeleg trøkk på Fosshaugadn. Igjen var det Daniel Arrocha som gjekk fram, og han var like sikker denne gongen. Ballen suste opp i høgre kryss, og det stod 2-1 på tavla! Det var også stillinga til pause, men etter kvilen var det meir å sjå fram til!

Når det var spelt 65 minutt kom den siste scoringa for dagen, og det var Edmund Baidoo som fekk æra av å fastsetje resultatet til 3-1. Erik Flataker og Oliver Hintsa kombinerte seg framover i bana, men ballen vart klarert ut til Martin Sjølstad. Innlegget frå venstrebacken traff ryggen til Felix Eriksson og rett framfor keeper dukka Edmund Baidoo opp og tuppa ballen i mål! Dette var 18-åringen sitt fyrste mål for Sogndal i OBOS-ligaen!

Det var ein nøgd tomålsscorar me møtte i mixed-zone etter kampen:

No skal me nyte denne sigeren i kveld og i morgon, men på måndag er karadn i full gang med førebuinga til neste kamp. Allereie på onsdag møter me Førde på bortebane i cupen. Kampen spelast klokka 17:30, og me håpar me får sjå Sogndalssupportarar på tribuna!

STAO NO PAO!