Imponerande siger borte mot Egersund og årets mål frå Vegard Hagen!
Karadn kjempa i 90 minutt og tek med seg 3 sterke poeng heim til Sogndal!
Høgt tempo, store sjansar og ei vanvittig scoring! Kampen mot Egersund hadde høg underhaldningsverdi, og me tek med oss 3 vanvittig deilige poeng heim til Sogndal!
Karadn fekk ein herleg start på kampen, og allereie etter 5 minutt kom den fyrste scoringa. Per-Egil Flo løfta ballen mot Sebastian Pedersen bak forsvaret til Egersund. Spissen fekk kontroll på ball og avslutta i stolpen, men på returen dukka spisskollega Oliver Hintsa opp. Frå 1 meter fekk han ei enkel oppgåve med å sende oss i føringa! Det var meget høgt tempo i kampen og det svinga raskt begge vegar. Lars Jendal varta opp med nokre fantastiske redningar, og når ballen passerte han stod Sander Granheim på streken! 0-1 var resultatet til pause.
Heimelaget fekk ha ballen i andreomgang, og karadn hadde god kontroll på det Egersund prøvde på i den fyrste halvdelen av andreomgang. Utover omgangen måtte Lars Jendal i akjson igjen, og leverte nok ein gong til perfeksjon. Fyrst mot slutten skulle det smelle skikkeleg, og då fekk me kanskje servert årets mål allereie i mai. Vegard Hagen fekk ballen midt på eigen banehalvdel, venda opp og fyrte av eit skot i retning mål. Kanonkula suste gjennom nærare 70 meter og rett i mål! Kampen om årets mål er truleg avgjort, og dei 3 poenga skal vere med heim til Sogndal! Sjå og nyt scoringa igjen her:
Når sigeren var i boks kunne ein sleppe jubelen laus. Vegard Hagen leia an ropet saman med dei tilreisande supportarane! Tusen takk for støtta!
Sigeren sender oss opp på ein foreløpig 2. plass på tabellen! Neste kamp i OBOS-ligaen er på heimebane mot Raufoss. Kampen spelast laurdag 31. mai kl. 16:00! Me håpar å sjå dykk på tribuna, og gler oss til meir underhaldning frå karadn!
STAO NO PAO!
