No er Henrik på plass
Henrik Furebotn er på plass som ny sals- og marknadsansvarleg i Sogndal Fotball. No ser han fram til å vidareutvikle samarbeidet med klubben sine mange partnarar. Partnarinnhald
I juni vart det kjent at Henrik Furebotn er ny sals- og marknadsansvarleg i Sogndal Fotball. No er han på plass på Fosshaugane Campus og godt i gang med arbeidet.
– Starten har vore veldig bra. Det er kjekt å vere tilbake i Sogndal Fotball og bli ein del av klubben igjen. Den første tida har gått med til å bli kjend med rolla, få oversikt over partnarane våre og setje meg inn i eksisterande avtalar og samarbeid. Eg har blitt teken veldig godt imot, og det er ein veldig kjekk gjeng å jobbe med, seier Henrik.
Samtidig ser eg eit stort potensial i å synleggjere klubben endå meir i lokalsamfunnet og regionen.
— Henrik Furebotn
Han har også sett engasjementet i næringslivet, då fleire bedrifter sette i gang ein billettstafett i forkant av førre heimekamp.
– Framover blir det viktig å ta godt vare på dei partnarane me har, samtidig som me skal jobbe for å utvikle og styrkje partnarnettverket vårt. Eg ønskjer å finne ut kva partnarane våre er opptekne av, og korleis Sogndal Fotball kan skape endå meir verdi for dei, seier Henrik.
Han peikar spesielt på relasjonsbygging som ein viktig del av jobben.
– Først og fremst håpar eg å vere ein god lagspelar for både klubben og samarbeidspartnarane våre. Samtidig ser eg eit stort potensial i å synleggjere klubben endå meir i lokalsamfunnet og regionen, og få fleire til å sjå verdien av å vere ein del av Sogndal Fotball. Me skal vere ein attraktiv møteplass og samarbeidspartnar, seier Henrik.
- Dette arbeidet er allereie i gong: Malin blir offisiell visningsstad for Sogndal sine bortekampar
Furebotn kjem frå jobben som salskonsulent i Toyota Sogn, ein av samarbeidspartnarane våre. Der har han jobba tett med kundar og relasjonsbygging. I tillegg har han jobba fleire år med utviklings- og organisasjonsarbeid hjå NFF Sogn og Fjordane som klubbutviklar.
– Me er veldig glade for at Henrik no er på plass i klubben. Han er utviklingsorientert, har god forståing for organisasjonen og den rolla Sogndal Fotball spelar i lokalsamfunnet og regionen. I tillegg kjem han inn med eit sterkt nettverk lokalt og regionalt, seier Ingrid Narum, dagleg leiar.
