Slitesiger mot Måløy!

Det vart ein jamn og tett kamp på Skavøypoll stadion i dag, men Sogndal 2 tek med seg alle 3 poenga heim til Saftbygda. Viljar Stavø scora leiarmålet like før pause, og i andreomgang kom det ingen fleire scoringar. Dermed sikra bortelaget 3 viktige poeng i Kretsligaen!

Laget som starta dagens kamp var:

Daniel Gjerde Sætren, Johannes Konstali-Lødemel, Noah Heggestad, Sander Aske Granheim, Sander Sjøthun Heggestad, Havila Bonabandi, Marius Årøy, Ola Lerheim Olsen, Kristian Kongelf, Andreas Haugen Duesund og Viljar Stavø.

Sjå oversikt over heile spelarstallen her!

Det var Songdal 2 som hadde mest ball i fyrsteomgang, men Måløy hadde dei største sjansane. Ein god Daniel Gjerde Sætren og nokre sterke blokkeringar frå forsvaret klarte heldigvis å halde ballen ute av målet. Heilt på slutten av omgangen dukka målsniken Viljar Stavø opp i boksen. Sander Sjøthun Heggestad la inn frå venstre, og Stavø fekk tuppa ballen i ein flott boge over keeper. Bortelaget gjekk til pause i leiinga.

I andreomgang var det eit mykje skarpare Sogndal 2 som kom på bana. Måløy sleit med å henge med, og ein god keeper hindra fleire scoringar. Utover omgangen utlikna Måløy skilnaden og det vart ein tett kamp. Som i fyrsteomgang måtte Daniel Gjerde Sætren i aksjon ved fleire høve, men det ville seg ikkje for Måløy. Ingen av laga fann vegen til nettmaskene i andreomgang, og det enda altså med 0-1-siger for bortelaget.

Sigeren sender Sogndal 2 tilbake på tabelltopp, men like bak følgjer Fjøra. Berre målskilnaden skiljer laga på tabellen, og den tette duellen i toppen av Kretsligaen held fram!

Neste kamp for Sogndal 2 er på heimebane mot Dale. Kampen spelast måndag 10. juni klokka 19:00 på Fosshaugane Campus.

STAO NO PAO!